يا مختار المخاتير بحكيلك الحكاية...
انا ما بحب الشرح كتير ولا عندي غاية ...
بدَي تفللهن على البيت طخنوا كتير كتير وكل مرة بتقول بكير..
زهقّتنا تأجيل بتأجيل والبلد حالتها تعتير يا مختار المخاتير...
حدود هالضيعة سايبة للرايح والجاية ..
وكل ما نطلب بتضرب إيدك عالطاولة وبتقول الوقت جاية...
الوقت عّم يمضى ويطير خلصّنا بقى يا مختار المخاتير ...
هنّي ببعضن زعلانين ..
الشعب شو بدّو فيهن ..
كُلُّ وزير بزيادة عليه مختار وعاملي حالو رئيس وامير ...
والشعب معتر تعتير يا مختار المخاتير ...
خبرني عن اي قرار عملتو من لما ابتدت الحكاية ..
على أساس شهر وشهرين ..
بذكر مرة بهالسنتين طلعت بالصوت العالي ..
تاري القصة يخزي العين فورة ضغط وساعة تخلّي يا غالي..
لبنان يا مختار ..
بدو عزيمة و بدو قرار..
بدّو رجال يخبط ويقول : هيك بتعمل يا جنرال ...
لا تقول براضي العشقانين وأنتو شو بدّي فيكن..
نحن شعب عايش بتعتير غلطتو وثق فيكن ..
غلطة شهرين كانت والغلط مسموح ببلدنا ..
مدت وصارت سنتين ..
هنّي مبسوطين فيهن..
ونحن بالزبالة غرقانين ..
يا مختار المخاتير....
ذكرتني حكومتنا بمسرحية فيروز مختار المخاتير
لمّة بتلتم على تقسيم الجبنة ..
وزارة بتسرّ العدو فيها المنيح وفيها شوية نشّالة..
هيدا عقلو بالزبالة ..
وهيدا عقلو بالتيليفونات ..
والتالت عقلو بالاوامر الخارجية ..
ومش لح ذكر بالقرارات الفردية اللي ارتجلا وزير الخارجية..
وعمو بالكرسي همو والبلد اخر همّو ..
كل واحد من الأرض آخذ شقفة ..
وعم بيقسمونا باليوم مية شقفة وشقفة..
لمّة والله يجيرنا من هاللمَة..
الرجال الآدمي يا مختار بينفع نصاهرو او نعاشرو..
بينفع صديق وماكسيمم شيخ حارة بس مش رئيس دولة ..
الدولة بدّا ركاب ... وبدا قرار..
الجمل مشهور بصبرو بس للأسف منو ملك الغابة..
ملك الغابة السبع ..
لأنو الصبر بعمرو ما كان حلّ..
يا رئيس شعبك من صبرك عّم ينحلّ..
بدنا رجال يخبط على الطاولة ويقول هيك بيصير..
مش بنأجل من يوم لا يوم ولا من شهر لشهر والله هيك ما بيصير...
ولا نحن ناطرين حل من برّا ...
لا من الشرق ولا من الغرب ..
لا من فوق ولا من تحت..
وبتقولو ليه عيونا على طول لبرّا..
والصلحة ممكن تمّ بس كيف عبر تقسيم الجبنة ..
يا اكلة الجبنة الله يرحم فؤاد شهاب لي عرف يسميكم...
انتو يا حكومة بوس اللحى وتفتيل الشوارب مش لح اذكر أساميكم..
لان المعنى ببطن الشاعر وانتو يا رجال البطون والكروش حيجي يوم والتاريخ يذكر أساميكم..
خربتولنا البلد وخربتو بيتوتنا الله يصطفل فيكم..
واخرتا شو بدو يصير يا مختار المخاتير...