قرأت نص التحقيقات مع المدرس قاتل طالب الدقهلية الذى شطر جثته إلى ثلاثة أجزاء، اعترافات مرعبة، استرعى انتباهى أن السبب هو الضائقة المالية التى يمر بها المدرس نتيجة مراهنات الإنترنت والتى جعلته يمارس ما هو قريب من توظيف الأموال فى القرية ليوزع الأرباح على أهلها.

لأول مرة عرفت من تلك الاعترافات تلك الألعاب الجهنمية التى تسلبك عقلك وتُدخلك فى دوامة لا نهائية وتضطرك فى النهاية للقتل بتلك البشاعة، اخترت لكم هذا الاقتباس من نص التحقيقات بدون تعليق، ولكم الحكم:

س: وما الباعث على ارتكابك لتلك الجريمة بقتلك المجنى عليه إيهاب أشرف عبدالعزيز عبدالوهاب؟

ج: أنا كنت بمر بضائقة مالية بسبب إن أنا ضيّعت فلوسى فى تطبيق مراهنات اسمه «one xbet» وكنت سالف فلوس من جماعة قرايبى وكنت مفهمهم إن أنا هشغّل فلوسهم فى تجارة الموبايلات مع واحد صاحبى مقابل أرباح أعلى من أرباح البنوك، بس الحقيقة أنا كنت براهن بيهم فى التطبيق ده وخسرت الفلوس دى وخسرت الفلوس اللى أنا كنت محوشها، وكان فيه ناس زى ابن خالى له فلوس مستحقة فى شهر يناير 2024 وبقية الناس فلوسهم فى أغسطس، وأنا لما حسبتها لقيت إن أنا مش هقدر أوفى بالفلوس دى فقررت إن أنا أخطف وأقتل وأطلب فدية علشان أسدد ديونى وأبدأ من جديد بعد ما حذفت تطبيق المراهنات ده لحد ما استقريت على إن أنا أقتل إيهاب.

س: وما هى جملة المبالغ التى قمت بالاستحصال عليها من أقاربك وذويك آنذاك؟

ج: أنا أخدت مبالغ على فترات متقطعة من عمى حوالى 140 ألف جنيه ومن ابن خالى مبلغ حوالى 15 ألف جنيه ومن مرات عمى مبلغ 36 ألف جنيه تقريباً، ومن ابنها مبلغ حوالى 22 ألفاً ومن مرات عمى التانية مبلغ 64 ألف جنيه، والاتفاق إن بداية تسليمهم الأرباح على فترات لحد شهر 8، وكنت مفكر إن أنا لما أراهن هقدر أجيب نسبة الأرباح لأنى كنت فى بداية اللعبة بحقق نسبة أرباح كبيرة، بس تانى يوم كنت بخسرهم وبعدين حسبت مع نفسى دخلى من شغلى فى الدروس الخصوصية لحد ما ييجى شهر 8 لقيت نفسى مش هقدر أوفى بكل الأرباح بتاعة الفلوس اللى أنا أخدتها من قرايبى، بالإضافة إلى أن ابن خالى كان ميعاد تسلمه للفوس فى شهر يناير وكان المفروض المبلغ اللى هيستلمه حوالى 27 ألف جنيه.

س: وما هى طبيعة تطبيق «one xbe» تحديداً؟

ج: هو تطبيق وموقع إلكترونى للمراهنات نزلته من على جوجل كروم وهو عبارة عن مجموعة من المراهنات اللى بتتم على ماتشات كورة أو أى رياضة من الرياضات اللى بتتذاع أو عدد الأهداف اللى يتتسجل وبيحاكى فيها الواقع وجوه التطبيق فيه ألعاب تانية زى الكوتشينة والدومينو على نفس التطبيق ده، وأنا كنت بلعب لعبة اسمها (سكراتش كارد) ودى عبارة عن إنى بخدش كارت بطريقة معينة وفيها نسبة كبيرة من الحظ ولو طلع التطابق رأسى أو أفقى أو مائل ده معناه مكسب وفى حالة الاختلاف بيكون خسارة وبربط الحساب بتاعى على التطبيق بالحساب بتاعى على فودافون كاش وببدأ أراهن بجزء من المبالغ اللى على حسابى ولما بكسب بينزلى المكسب على حساب فودافون كاش.