الفنان رامي صبري يوضح تفاصيل تسريب ألبومه الجديد

كشف النجم رامي صبري عن تفاصيل تسريب ألبومه الجديد وحقيقة ما حدث بشكل كامل وذلك من خلال حسابه على فيسبوك.  وكتب: "توضيح.. بعد صدمتى وصدمة كل الناس اللى اشتغلت على ألبومى الجديد لما سمعنا التسريب أمبارح وبالكوالتى اللى اتسرب بيه.. نزلت امبارح بوست أن شركة اورانج هى السبب فى وصول الألبوم للمواقع بالشكل ده لكنى اكتشفت أن شركة اورانج ملهاش علاقة بالموضوع وانها بتقدم خدمة لعملائها بالاتفاق مع الشركة المنتجة انهم يكونوا اول ناس تسمع اغنيات الالبوم بتاعى قبل اى حد تانى وكانت الأغانى هاى كواليتي".

وتابع: "للاسف أن بعض من اصحاب مواقع التزوير والقرصنة استغلوا الخدمة ورفعوا الألبوم وسربوه بالكواليتى السيئ اللى سمعتوه وضيعوا تعبى وتعب كل الناس اللى اشتغلت على الالبوم بقالها سنة ونص بداية من المؤلفين والملحنين وشركة مزيكا اللى انتجت الألبوم علشان يطلع باحسن شكل واحسن كوالتى وشركة اورانج اللى اشتغلت معانا وحاولت تميز عملائها وتسمعهم الألبوم قبل اى حد تانى.. الناس دى بتدمر تعب ناس كتير وبتدمر صناعة كاملة". 

وأضاف: "مجهود وفلوس بتروح على الارض كم الاحباط اللى عيشته امبارح بعد لما سمعت التسريب وحسيت أن كل حاجة عملتها ضاعت فى لحظه مش انا بس كل الناس اللى اشتغلت على الألبوم". وأوضح: "وأكرر أن شركة اورانج ليس لها علاقة بموضوع تسريب الأغانى وأنها قامت بكل الجهد لتوصيل البومى للجمهور وانى أكن لها كل الاحترام والتقدير".