أحمد عصام يكشف كواليس مسلسله الجديد "طلقتلك نفسي" المُنتظر

كشف الفنان المصري أحمد عصام، تفاصيل مسلسله الجديد "طلقتلك نفسي" الذي يشارك فيه ككاتب للعمل وممثل أيضًا، مشيرًا إلى أنه سيناقش أزمة الطلاق المتفشية في المجتمع المصري والعربي.

وقال عصام: "أنا مؤلف العمل وممثل، وسيناريو وحوار أحمد صبحي، تجربة جديدة عليا، أنا كنت بكتب حاجات قبل كده بس بصفة ودية مع كتاب كبار، المرة دي رسمي بعمل حكاية اسمها طلقتلك نفسي".

وأضاف: "بنتكلم عن مشاكل الطلاق اللي بتواجه المجتمع المصري والعربي من خلال حواديت صغيرة.. كل حدوتة ساعة ونصف زي الأفلام.. 15 حدوتة على مدار 30 أو 35 حلقة".

وتابع: "بنعرض في المسلسل من خلال كل حدوتة، المشكلة من وجهة نظر الراجل والست".

وعن علاقته بالفنان تامر حسني، خاصة أنه من المعروف أنهما صديقان مقربان للغاية، قال: "بياخد رأيي في أفلامه وأعماله، بس الرأي الأول والأخير ليه هو.. زي ما بأخذ رأيه برده في كل حاجة".

وأردف: "بنقعد نفكر مع بعض في الشغل وفي كل شيء، وسبب غيابي عن أفلامه الأخيرة رغم صداقتنا إن مفيش ورق مناسب يجمعنا إحنا الإتنين".

وواصل: "الناس دايمًا بتربط الشغل بالصداقة، يعني مدام أصدقاء يبقى لازم نمثل سوا، لا مش شرط خالص، صداقتي بتامر ملهاش علاقة بالشغل نهائي".

وأكمل: "مفيش حاجة اسمها إن مدام تامر بيعمل حاجة يبقى لازم أكون معاه... هو صاحبي وأخويا وإحنا في ضهر بعض من غير أي أهداف".

واستطرد: "لو تامر عمل دور مش كويس، معتقدش إني هروح أقوله الكلام ده وأشوه المجهود الي عمله حتى لو أنا شايف إن في حاجة غلط".

واختتم: "الناس مش بيجتمعوا على أي حاجة أبدًا، وكل واحد ليه وجهة نظر وممكن توصل وجهة نظرك للي قدامك من غير ما تجرحه، لإن العمل الي هو تعب فيه ده خلاص حصل ومفيش حاجة ممكن ترجع لو قلت رأيك بطريقة حادة".

يذكر أن أحمد عصام ممثل شاب قدم العديد من الأدوار الفنية في مسلسلات وأفلام، منها مسلسل "ولي العهد" مع حمادة هلال، ومسلسل "آدم" مع تامر حسني، كما ظهر في أكثر من كليب للأخير كضيف شرف.

-قـــــــــــــــد
يهمــــــــــــــــك أيضـــــــــــــــــا

تامر حسني يُعلن أن مشاركته في حفل ختام بطولة الأمم الأفريقية شرف

نهال عنبر تكشف تفاصيل دورها في "طلقتلك نفسي" مع أحمد عصام