نعم يا سادة، هذا هو العاجل في إعلامنا الوطني الحر إعلام التطبيل والسلابية، يجب أن نقول الحق، الرموز الإعلامية الصراحة مية مية، عندك مثلا وائل الابراشي من يومين عمل لقاء مع بطل مصر في الجودو اللي يا عيني بياع بلح، وإزاي الراجل ده اتظلم والدولة مش مهتمة بيه، سؤال بس مين ده ؟! اه والله مين ده، وقال طالع يقولك جاب دهب وفضة فين أيوة برضه مين ده؟  طب فكرت يا ابراشي تتكلم عن بطولة العالم اللي كانت من أسبوع فكرت تتكلم عن البطل المصري العربي الأفريقي والعالمي رمضان درويش اللي مش واخد حقوا ولا أنت فالح تجيب بتاع البلح بس صحيح معلش نسيت انكوا إعلام البلح.

ويوم ما قولت هتجيب رمضان قولت أخيرا فقتوا أخيرا اهتميتوا بس لقيتك مدخلي قبليه منة راقصة سيب ايدي، يعني اللفظ الوحيد اللي ممكن أقوله مينفعش أقوله هنا.

إعلام النفاق مبيفتكروش الرياضة لما يملوا وقت أو مكان فاضي، مثلا أنا في برنامج عندي وقت فاضي يقوم المعد يعمل تليفون مع بطل العالم المصري في السومو عشان يطلع يقول ازاي هوا مظلوم ومحدش ساعدوا، وإزاي هوا تعب عشان يرفع علم مصر، وهو دلوقتي قاعد في أميركا بيقول عشان يستعد لبطولة مش عارف إيه، بس سبحان الله كل ما افتح الفيس آلاقي ٥٠٠ سيلفي في الاستاتس .

مرة تانية "الأهرام" حب يملي نص صفحة فاضية قام حط مقالة بتتكلم عن أبطال مصر في الاولمبياد، بس حاطط صورة إسلام الشهابي علي انو رمضان درويش مع أن لو كتبنا في "غوغل" رمضان درويش من كتر الصور هيطلعلك صور هو مشفهاش أصلا.

ولكن إزاي إحنا إعلامنا مش فالح غير في المواضيع المهمة اللي بتمس مستقبل مصر، طبعا أنا بتكلم على طرابيك وعروسته ومش هتكلم أنا في الموضوع ده عشان بحس بحقارة كدة.

 دلوقتي الواحد يفتح التلفزيون يلاقي أفلام في منتهى الانحطاط ومسلسلات ملهاش أي ستين لازمة، وبرامج زبالة ريهام عفاريت الليثي.