هذه قصة من الذاكرة، عندما سجل عسكرى المرور مخالفة على سيارة وزير الداخلية، اللواء أحمد رشدى، وهو فى السيارة.. ولم يزجره الوزير أو يعنفه أو يقول له: إنت متعرفش أنا مين؟.. طبعاً لم يكن الوزير يسير فى موكب وعشرات السيارات معه أو تسبقه الموتوسيكلات تفتح الطريق وتغلق اليمبن والشمال.. كانت سيارة واحدة هى كل ركاب الوزير بلا مقدمة أو موتوسيكلات تفتح الطريق وتمهد له!

تفاصيل الواقعة حدثت فى فترة توليه للوزارة (ثمانينيات القرن الماضى)، قام عسكرى مرور بتوقيف سيارة كان يستقلها الوزير أحمد رشدى، مخالفة لقواعد المرور حسب الروايات والذكريات ولم يكن العسكرى يعرف شخصية الوزير، فكان رد فعل العسكرى أنه قام بتطبيق القانون بحزم، وحرر له مخالفة مرورية وألزمه بدفع الغرامة فوراً دون أى تردد أو تراجع رهبةً من منصبه!

وهنا أبدى الوزير رد فعل طيبا، فبدلاً من تعنيف العسكرى أو استغلال سلطته ونفوذه لإلغاء المخالفة، أبدى أحمد رشدى إعجاباً كبيراً بشجاعته والتزامه بالواجب، وقام بدفع الغرامة على الفور، وأثنى على العسكرى لتمسكه بتطبيق القانون على الصغير والكبير!.

تعكس هذه الحادثة - التى تحولت إلى نموذج يُحكى فى الانضباط واحترام القانون- طبيعة شخصية أحمد رشدى الذى يُعد أحد أكثر وزراء الداخلية شعبية واحتراماً فى تاريخ مصر الحديث!

كان الوزير عائداً بعد الظهر، وفى اللحظة دى الإشارة كانت واقفة.. لكن سواق اللوا أحمد رشدى اتحرك وكسرها.. وهنا ظهر رقيب مرور وكان اسمه كامل على عيد.. وراح موقف العربية.. وبعدها سجل عليها مخالفة كسر إشارة.. وكمان حصل المخالفة وهو واقف. بص لورا وشاف اللوا أحمد رشدى: طبعا وشه جاب ألوان.. وقال «الله يرحمنى كدا».. أقل حاجة هتفصل ده لو ربنا كرمنى ومدخلتش محاكمة عسكرية بعد اللى عملته.. وبعد الصدمة، أدى التحية للوا أحمد رشدى اللى ردله التحية من غير ما يعلق ولا يقول أى حاجة.. ومشيت العربية فى طريقها!.. لكن الرقيب كامل فضل واقف مصدوم وبعد شويه ورديته انتهت.. ولما روح البيت بقى مستنى الكارثة تحصل فى أى لحظة، والصبح جاله استدعا من مديرية أمن القاهرة.. وهنا دعا ربنا وقال «اللهم إنى لا أسالك رد القضاء ولكن أسألك اللطف فيه».

لبس هدومه وراح على المديرية.. وأول ما وصل قالوله «اللوا حسن مستنيك».. وكانوا يقصدوا اللوا حسن حسين أحمد مدير أمن القاهرة.. الرقيب دخل على مدير الأمن وهو مرعوب.. لكن فوجئ بالراجل بيقول: أهلا أهلا يا كامل ياللى مشرفنا.. الرقيب سأله: خير يا فندم؟.. مدير أمن القاهرة قال: سيادة الوزير مبسوط باللى انت عملته.. وكمان عملك ٢٠ جنيه مكافأة.. ولولا إنه مشغول كان قابلك بنفسه وسلمهالك.. لكن سيادته كلمنى عشان أقابلك شخصيا وأحييك على اللى عملته.. وكمان بيقولك «يا ريت الناس كلها تبقى زيك!». رحم الله الوزير المحترم أحمد رشدى.